KEDUDUKAN URANG NAN AMPEK JINIAH DI NAGARI

Anau ketek anau di lurah, diumbuak di umbi jangan

Nambo Mudo tagak manyambah. Di upek di puji jangan

Ayam Hitam pandai baranang, kaki nan dapek di buayo

Duduklah sanak din an tanang, nak tagak Nambo bapidato.

Aka banamo aka cambia, Cindai di ambiak kabasahan

Bukan Nambo cadiak Pandai, adat pidato di sambahkan.

Balaia kapa ka nagari, balaia sampai kalautan Rajo mamandang bahadapan

Heranlah puti dek mancaliak

Nambo mancurai mmaparkan

Jadi Pitaruah dek nan Tuo, jadi pitaruah dek nan cadiak

Apolah nan jadi pitaruah dek nan tuo, pitua dek nan cadiak,tatkalo nagari kadiunyi, di buek kato parbuatan, apolah nan jadi kato parbuatan , picak ka samo kaditapiak, bulek lah samo ka digiliang, lah bulek kato parbuatan , bulek lah buliah di golekkan, picak lah buliah di layangkan , Saitiak – Saayam, sa anak sa kamananakan, anak satu kamanakan surang. Kampuang lah ba ompok, nagarilah babanja, Apokoh tando dalam kampuang rumah tango, sawah jo ladang, kampuang jo halaman, apokoh tando dalam nagari, bardiri balai jo musajik. Jikok balainyo di nagari iyolah urang nan ampek Jiniah, mamagang jabatan masing masing, Artinyo urang nan ampek jiniah : Imam jo Katik, manti jo hulubalang

Jikok Imam Jo Khatib, Malam Rintang jo  kitab, Siang rintang bapitua

Adopun Manti di nagari : Haluih aka lauik bicaro, tahu dipundak kabasahua, tahu di rantiang kamalantiang , tahu di bahan ka mancamuak. tahu di batang kamalintang

Mambuhua indak mambuku, mauleh indak mangasan, di atok langik jo bicaro, bumi nan indak katirisan, pisau kateh haluih mato pangabuang batang malintang.

Jikok dubalang di nagari, namuah basusah jo payah, tahu di parik nan lah tahampa, ranjau nan lah lapuak, namuah batuhuak jo baparang, namuah bakuah kuah darah, malam basalimuik ambun, siang basalendang paneh, indak kurang sanjato tajam.

Tahan sapik jo guntiang, tahan gurindam jo garagaji, nan kareh di takiaknyo, nan jauah nan kadijapuik, jikok ndak basuo nan bak kian bapantang babaliak pulang, manungkuik inyo kabumi, manangadah inyo kalangik, badan nan tangkeh dari kilek, karehlah pulo dari basi, sirah mato di galanggang, tabusuang dado dinan rami, namun bana barasak indak, takuik di adat nan karusak, takuik agamo tak kan kokoh, susah parentah tak kamaju, banang sahalai bapilin tigo.

 Adopun panghulu di Nagari : Pusek jalo pumpunan tali, Balaia manantang pulau, bajalan manantang bateh, bakato manuju bana, ameh batuah tahan uji , bungka ganok tahan cubo, naraco pantang bapaliang.

Payakumbuah baladang kunyik

Dikida jalan ka kuantan

Tak namuah kuniang dek kunyik

Tak namuah lamak dek santan

Mamacik kato nan bana

Tasilojoh janjang manurun

Tatukiak jajak mandaki

Adat jo sarak nan tasusun

Rakyat sanang padi manjadi

Mangkuak Joro, pingganyo jorong

Sabuah barisi nasi

Sambah kami jiko tasorong

Niniak jo mamak mampabaiki

Kalalawa di pulau rimbang

Anak ruso mati tadabiah

Kalau salah buliah ditimang

Badoso ampun nan labiah

HINGGOK MANCAKAM, TABANG BASITUMPU

HINGGOK MANCAKAM, TABANG BASITUMPU

Adaik Basandi Sarak, Sarak Basandi KITABBULLAH

Pambilangan Adaik Minangkabau nan mambukak paluang untuak Seseorang untuak ikuik ba status sabagai Masyarakat Adaik Minangkabau dalam sabuah NAGARI, nan barasal dari sabuah Nagari lain maupun dilua Minangkabau.

Yaitu : Mamasuakkan urang itu kadalam Suku nan ado dalam sabuah Nagari, sahinggo nan basangkutan bastatus sabagai “ KAMANAKAN”

Ungkapan lain dari “ HINGGOK MANCAKAM, TABANG BASITUMBU adolah : MANGAKU MAMAK

Kepado nan basangkutan di agiah Fasilitas Adat salaku Anak Kamanakan, Sahinggo kemudian mamungkinkan pulo nan basangkutan untuak manambah jo aka Pikiran, Usaho nan Tanagonyo sarana atau Fasilitas Suku tsb.

Kepado nan basangkutan di wajibkan manjalankan Kewajiban, Kewajiban sebagai Anak Kamanakan.

Nan Basangkutan harus marasokan dan mangamalkan pandangan dan basikap hidup bahwa nan basangkutan itu bana bana SAHINO SAMALU, SALARANG, SAPANTANG jo Anggota SUKU tampek inyo tsb.

Nan basangkutan buliah mandapekkan bagiha tatantu dari Pusako TINGGI, Pusako SUSUAK dan Pusako RANDAH nan ado pado suku tersebut, dengan mangikuti aturan aturan nan ado.

Nan Basangkutan Alun Buliah/Tidak dapek lansuang mamakai SAKO KEBESARAN ADAT Suku nan basangkutan.

Masih Ado beberapa Fase Pelarutan nan basangkutan kesempatan manyandang SAKO SUKU basangkutan mamakan waktu nan lamo.

PERLUNYO SESEORANG MANGAKU MAMAK

1.      Karano Si laki laki nan basangkutan ka kawin di sebuah SUKU dalam Nagari basangkutan

2.      Karano Keluarga (Laki Bini) nan basangkutan maatap di Nagari yang basangkutan untuak mancari Makan/Rasaki

3.      Karano Padusi yg basangkutan indak urang basuku. Matrilinial dan balaki jo laki laki di Nagari yang basangkutan nan basuku Matrialinial.

4.      Mampaluas kekerabatan dan Membakukan Sistem Kekerabatan Minangkabau

5.      Bilo seseorang itu urang Minangkabau mako inyo mangaku mamak, kapado suku nan basamoan jo sukunyo yang di tinggakan di kampuang asanyo

6.      Bilo urang tu Urang Lua Minangkabau, mako inyo akan mangaku mamak kepado suku nan di Piliahnyo sendiri dan indak Suku bakal Suami/Istri.

Paralunyo/Mamfaatnyo Mangaku Mamak :

1.      SEMUA PIHAK Panduduk Nagari Indak Maraso Bahwa Si Pandatang itu urang Asing dan Sipandatang itu indak maraso Asing di dalam Nagari tsb. Garih adat tantang kasus iko ialah : JAUAH MANCARI HINDU, DAKEK MANCARI SUKU

2.      Laki laki nan Mangaku Mamak, indak akan banyak pangaruah terhadap suku Tapatan

3.      Kalo nan mangaku mamak tsb seorang padusi, mamang lambek laun akan ado pangaruah ka Suku tepatan karano Garih katurunan Urang Minang manuruik jalur garih Ibu (Matrialinial)

4.      Warih di Minangkabau garih besarnyo adolah duo Jenis :

a.      Warih Nasab ialah garih nan batali darah lansuang, mauruik garih Ibu, sakurang kurangnyo 7 katurunan kateh 7 katurunan ka bawah.

b.      Warih Sebab ialah warh nan di sababkan oleh sesuatu sarupo sabab budi, sabab ameh dan sabagainyo.

Proses Adat Mangaku Mamak Adalah sebagai berikut :

1.      Mangadokan Pendekatan Awal, dengan mangatokan Keinginan yang basangkutan ka salah surang Tunganai adat (staf) Panghulu di sabuah suku nan di tuju.

2.      Oleh Tungganai tersbut di sampaikan ka Tungganai tungganai pasukuannyo lalu di mufakatkan sasudah tu di ajukan ka Datuak/Panghulu Kaum nan basangkutan dan disetujui , sudah tu di adokan karajo adat Mangaku Mamak di Rumah Gadang/ Rumah Pusako Pasukuan Tersebut.

Pelaksanaan Adat Mangaku Mamak

1.      Dilaksanakan di Rumah Gadang/Rumah pasukuan Suku tersebut.

2.      Panghulu akan manarima kamanakan

3.      Di hadiri Tunganai dari suku na basangkutan

4.      Di hadiri Datuak datuak/Panghulu nan tagak sapamatang duduak sahamparan jo panghulu yang basangkutan sasuai langgo langgi adat nan di pakai di nagari tsb

5.      Urang nan mangaku mamakmangadokan jamuan makan kapado hadirin tersebut dan

6.      manatiang jamba “NASI KUNYIK PANGGANG AYAM” dan mandabiah tarnak (mandarah)

Taranak nan di dabiah sarandahnyo Ayam dan satingginyo Jawih (SAPI), Gadang Api gadang kayunyo, Nak tuah batabua Urai, tampek nan dalam buliah baranang, tampek nan dangka buliah basijingkek

manatiang jamba “NASI KUNYIK PANGGANG AYAM” dan mandabiah tarnak (mandarah)

Taranak nan di dabiah sarandahnyo Ayam dan satingginyo Jawih (SAPI), Gadang Api gadang kayunyo, Nak tuah batabua Urai, tampek nan dalam buliah baranang, tampek nan dangka buliah basijingkek.

7.      Kapado Niniak mamak nan hadir di agiah “AMEH MANAH” atau TAHIL EMAS yaitu sejumlah uang indak di tantukan banyaknyo : Kok Pitih Babilang, Kok Ameh Batahil, Kok Kain Balipek dalam hal iko bukan Jumlah nan utamo tapi IKHLAS .